1. Knubbel der Kölsche Funke rut-wieß vun 1823 e.V. - Rote Funken Köln

Knubbeltour 2009

1. Knubbel
Kölsche Funke rut - wieß vun 1823 e.V. - Rote Funken Köln

1. Knubbel der Kölsche Funke rut-wieß vun 1823 e.V. - Rote Funken Köln


Knubbeltournoh Maastricht 2009

2009

Knubbel - Tour noh Maastricht (NL)

vun Drihpitter (Hermann-Josef Müsch)

Wo de Meisjes sin, wo de Meisjes sin ...

do sullt et hin jon. Un weil dat jo em Usland es, met fremde Sproch und Jebräuche, jov et eetsmolig en Knubbeltour-Handboch met Tipp`s un Vokabele.

Dat hat dä „Muggel“ fing jeknuv un do stunden su wichtije Saache dren wie dä Funke-Eid un uns Knubbelleed op holländisch. Un natürlich die wichtigste Redewendunge, die mr op n`r Knubbeltour evvens bruche künnt (jedenfalls, wann mr et drop anläje däht):

Redewendungen Deutsch-Niederländisch
Knubbeltour noh Maastricht (NL)

Un dozo och noch de Texte vun nem janze Püngel kölsche Leedcher, domet och all kräftig metsinge kunnte, wann unser „Pluuteschaaf“ anstemme däht.

Ävver vun Anfang an:

Loss jing et öm 9:00 Ohr an dr Ülepooz. Unsere Knubbelkasseerer hat sich selvs üvvertroffe und tatsächlich ne 4-Stääne-Bus met Lokus bestallt. Weil dat mer nor 50 Mann wore, hatten mer och all jenoch Plaatz un kunnten et uns jemütlich maache. Dä Busfahrer hät uns eets widder ne lange Vördrag jehalde, wat mr em Bus all zo dun un zo losse hätte. Zojehürt hät dem ävver keiner, weil dat mr jo all erfahrene Busbenötzer sin un dat jo alles ald wesse (wie immer komen die Froge dann späder!). Dann es hä met uns op dem nöchste Ömwäch op de Autobahn jefahre un et jing af Richtung Holland.

Zoeets sin mer üvver Roermond noh Maasbracht jefahre. Do sin mer dann su jäje 11:00 Ohr op ne Maas-Dampfer jeklomme un met dem jenöchlich dä janze Nohmeddach lang bis noh Maastricht jetuckert. Et wor herrlich Wedderche, et jov reichlich zo müffele und zo süffele, dä Franz spillte op singer Quetsch un su blev et nit us, dat unser „Pluuteschaaf“ flöck sing Leedcher antemmte un dank denne Texte us dem Handbooch kunnten och all Fründe kräftig metsinge. Et wor en richtig schöne un jenöchliche Dampferfahrt un keinem wor et langwielig. Am späde Nohmeddag han mer dann tirek jäjenüvver vum Hutel anjelaht. Ne koote Spazierjang üvver e Bröckche un mer woren do.

Knubbeltour noh Maastricht (NL)

Ovends han mer dann zosamme en „EDD`s Cafe“ en dr Altstadt vun Maastricht jejesse. „EDD`s“ steit för „Eat, Dance and Drink`s”. Dat Esse wor jo nit schläch, ävver dat Bier wor nit su unsere Fall und op „Dance“ hät doröm och keiner mieh jewaht. Weil dat noch spät ovends su en herrlich Lüfje wor, sin mr all en klein Jrüppche durch et Städtche spazeet un han en denne ville Stroßelokale he un do ne Kleine jedrunke, bevör mer widder zoröck en et Hutel sin. Do wor allerdings jar nix „jekoch“! Dä Lade wor knatsch-leddich: Wigg un brigg kein Meisje zo sin. Dä, jitz stundten mer do met unserem Handbooch un denne janze Vokabele un kunnten se nit anwende.Zo allem Üvverfluss däht die Hutelbar och noch pünklich öm 1.00 Ohr zomaache! Als Nutbehelf hat dä Knubbelvörstand zwar ein Zemmer, wat wäje nr Stornierung frei wor, als „Ersatz-Bar“ enjericht, wo och promp all „Spätheimkehrer“ af 3 Ohr enjefalle sin: Ergebnis und Siegerehrung: die Huteljäss, die op der Etag schlofe sullte, han am nöchste Morje all de Bezahlung verweigert!

Sambsdags wor bis Meddach frei. Zum Meddachesse sullten mer uns dann all an dr „Friture Reitz“ en dr Altstadt treffe. Dat wor en bessere Fritte-Bud un do krät jeder ne Jotsching för ein Portion fettige Fritte met nr undefinierbare Frikandel un nr Dos Bier, wat mr sich dann alles en dem Lade afholle un op dr Stroß verdröcke kunnt. Su jäjen 2:00 Ohr nohmeddags kom dann unsere Funkefründ Ludo Kruijthof , inaktives Mitglied em drette Knubbel un ehemaliger Mililtär-Attaché, dä en Maastricht zo Huus es un hät met uns en interessante Stadtführung jemaht, die noh 2 Stündche en nem schöne Altstadtlokal zo Engk wor.

Ovends hatten mer dann unser traditionelles Galaessen. Dozo sin mr met dem Bus noh „Fort Sint Pieter“ jefahre, wat op nem keine Hügel tirek vör dr Stadt litt. Dat es en alt Fort us dem Kreech, dat han se usjebaut zo nem  Veranstaltungsplaatz. Vun do hatten mer ne herrliche Bleck üvver Maastricht. Dä Caterer hat dat och janz stilvoll enjerich un et Esse wor wirklich lecker. Zoröck em Hutel woren mr widder de einzige Jäss en dr Bar. Die „Jiehhöschtije“ sin dann noch ens en et Städtche jejange. Die „Ersatzbar“ wood en der Naach zwar och konsulteet, ävver deutlich ruhiger als en dä Naach zovör.

Knubbeltour noh Maastricht (NL)

Sunndags hieß et dann noh dem Fröhstöck uschecke. Öm 11:00 Ohr sullten mer affahre noh „Kasteel Hoensbroek“. Norjo, et wood dann zwar halve zwölf, weil sich eine Funkefründ verpennt hat, ävver för de Knubbelkass wor dat jar nit schläch. „Kasteel Hoensbroeck“ es e Schloß, wat en singe Anfäng en dat 14. Johrhundert datiert. En denne nöchste Johrhunderte usjebaut un ständig erweitert, es et hück als Museum zo besichtige und för Veranstaldunge zo mede. Su hat och unsere Knubbelvörstand he ne jroße Raum en dr fröheren Remise jemeet un do wodten mer widder vun dem Caterer, dä och dat Galaesse usjericht hat, bedeent.

Ungerhalde wode sin mer vun dä Jrupp „Kölschplatt“, en holländische Musikjrupp, die sich op Leedcher vum „Kölsche Kleeblatt“ spezialiseet hät. Och en „Show-Tanz-Gruppe“ (dä Name han ich verjesse) met durchus leckere Meisjes hät uns do beihrt un uns en paar Dänzje jezeig. Un weil dat mer jo och en Holland als usjesproche talentierte Dänzer bekannt sin, kunnten mer uns nit lumpe losse und han denne Meisjes et Wibbele beijebraht.

Su jäjen 4:00 Ohr nohmeddags sin mer dann langsam opjebroche, en unsere 4-Stääne-Bus jeklomme un widder op Kölle an jefahre. Un weil do noh denne 3 Dag hollänischem Ries- und Maisbier alle Mann em Bus üvver die Restbestände vun Kölsch herjefalle sin, wor dä Lokus em Bus natürlich zo klein: Mer mohten an dä Raststätt en Frechen noch ens en Päusje enläje.

Ävver dann jing et tirektemang noh dr Ülepooz, wo en jenöchliche Knubbeltour ihr Engk fung.


Besucher Nr.:

 

(c) 2004 - 2017/ 1. Knubbel der Kölsche Funke rut-wieß vun 1823 e.V. - Rote Funken Köln [Stand: 24.03.2017]
   Webmaster: Ingo E. Müller - Fleutekies