Nä, wat wor et widder schön !

Am 12. September ging et loss: Eeschte Knubbeltour vum NEUE Knubbelvörstand. Nu sät mr jo: Neu Bessem kehre jot. Un doröm jov et och en paar Neuerunge. (Nit, dat dä ahle Bessem schläch gewäse wör, ävver hä wor evvens schon en bessje „afgenötz“. Doröm hät hä sich wall och geschont un es nit metjefahre.)

Loss jing et ald tireck met dä 1. Neuerung: Mer sin pünklich afjefahre !!

Bekannt wor nur, dat mer em Rheinland blieve sullte; wo genau, das woss nor dr Knubbelvörstand. Zoeesch ging et ens Richtung Norden. Un weil dat die Junge vum 1. Knubbel jo vür „Mannesmut“ strotze – dat sät jo schon unser Knubbelleed – sin mer tirektemang en die „Verbotene Stadt“ jefahre. Do hat uns unsere Aspirant Henning Graf von Schwerin en et Steigenberger Hutel zom Fröhstöck engelade. Un weil dat mer jo höfliche Lück sin, han mer och met Todesverachtung ein bis drei Alt-Bier jedrunke. Mer hatten dann zwar dr janzen Dag ne fiese Geschmack en dr Muul, ävver ähnslich malad es keiner dovun jewode. Et jov allerdings och en Fässje Kölsch zom Nohspöle.

Nohdem mer uns do söns jot jestärk hatte, sin mer dann widder en dr Bus jeklomme un et jing wigger.  Jitz widder Richtung Süden.

Mr weiß nit, of et am Heimatjeföhl loch oder am Alt-Bier; jedenfalls hatten en paar vun denne Junge schon en Bocklemünd richtig Druck un do wood die 2. Neuerung offenbar: Dä Knubbelvörstand hat jespart un ne Bus ohne Klo jeordert! Weil dat et ävver op dr Autobahn vun Bocklemünd bis noh Hürth kein Möglichkeit jitt anzohalde, sin die Junge em Bus vun einem Bein op et andere jehöpp. Se han et ävver all jeschaff un om Rastplatz Hürth woren de Düre em Bus zo klein för all die – allen vürop dä Muggel - die schnellstens erus moote.

Donoh wor et ävver dann en jenöchliche Wiggerfahrt met Jesang un Klaaf un en knapp Stündche späder komen mer dann en Bad Neuenahr an. Do sin mer em Dorint-Parkhutel afjestiege un han zoeesch ens die Hutelbar erkundet. Dann hieß et: Ömtrecke, denn för dä Ovend wor Galadiner anjesaht.

Dozo sin mer met dem Bus – och widder pünklich – noh Mayschoss jefahre. En dä Winzergenossenschaft jov et zoeesch ens en Gläsje Sekt und „Fingerfood“, dat sin su klein Häppche för de Muul zo zänke. Wor ävver lecker! Donoh hatten mer en Führung durch dä historische Wingkeller und dat Wingbaumuseum bevör dann em große Gewölbe-Weinkeller et Gala-Menü opjedesch wood. Dobei hatt dä Knubbelvörstand ävver nit jespart:

Jebröötsch hat uns dat dä bekannte Koch Wolfgang Steinheuer und et wor wirklich jot. Mallich hät kräftig zojeschlage un es jot satt jewoode. Su jäjen elef Ohr sin mer dann en et Hutel zoröck un han do noch jenöchlich en paar Afsacker jenomme.

Am nöchste Morje kunnt mr af halve sibbe fröhstöcke. Weil dat dat Mumienschieben ävver su lang jejange wor, han dat de Winnigste en Anspruch jenomme. Mer hatten jo och Zick, denn eesch öm ein Ohr meddags – pünklich - jing et widder los. Mem Bus noh Dernau, nöchste Weinprobe em Gewölbekeller vun dä DAGERNOVA Weinmanufaktur. Da jov et och jet deftiges zo müffele un mer sin von dr amtierenden Weinkönigin bedeent woode.

Vörjesin wor donoh en Wanderung op dem Rutwing-Wanderwäg, ävver weil dat et Wedder nit su jot wor, op einmol all Höhnerauge un zovill jejesse hatte, han mer dat usfalle losse un sin en et Hutel jefahre. Do hatten se zweschendurch nen Großbild-Fernseher orjaniseet un mer han all zosamme dat Fossballspill  vum FC jeloort. Dozo jov et Zupp un Curry-Woosch un die eeschte han och ald widder en Bierche probeet.

Öm 18.00 Ohr - pünklich – jing et dann noh Ahrweiler zo nem zünftije Ovendesse en „Bell`s Restaurant“. Nohdem uns do och noch en Jrupp Kiesköpp en Ständche jebraht hatte – die Junge han wirklich doll á capella jesunge – sin mer op et Altstadtfest met Weinmarkt jejange. Do hät unsere Gineral Truffel zo Ihre vun singem Jebootsdag, dä hä jo jedes Johr op dr Knubbeltour hät, en paar Fläschelcher Winzer-Sekt usjejovve un mer han en kräftig huhlevve losse. Em Hutel han mer dann noch bis jäjen vier Ohr morjens die Vodka-Bestände kräftig dezimeet, dann sin all en et Bett jekroffe, han sich wärm zojedeck un geschlofe, weil am nöchste Morje „Alkohol-Verdunstungsstunde“ anjesaht wor.

Et jing op die „Adenbachhütte“ un weil die huh em Wingberg litt, wo dä Bus nit hin kunnt, wor klemme anjesaht. En paar mohten jedaut, andere jetrocke wäde, ävver se sin all jot anjekumme un hatten och ald widder Doosch. Weil su en schön Weddersche wor, kunnt sich dat janze drussen afspille, dat heiß, drenne wood jejrillt, drusse wood jemüffelt. Do hät uns dann och noch die Funkengarde us Ahrweiler besök, dat es dä älteste Traditionsverein us dem Dörp – jejründet 2003 – un hät för uns jedanz. Mer han för die jewibbelt un unsere Lingedänzer hät et sich natürlich nit nemme losse, denne ihrem Marie zo zeige, wat ne echte Mariechedanz es.

Dann kom als Üvverraschungsgast en ech kölsch Mädche: Et fussisch Julche.

Dat Marita wor jot drop un hät en dreiveedel Stund för uns jesunge. Uns Krabbelgrupp hät dr „Bäckground-Chor“ jemaht un och dem Flambau sing großkarierte „Knubbeltourbotz“ wood anjemesse jewürdigt. Su jäje 4 Ohr nohmeddags sin mer dann langsam widder dr Berg eraf spazeet, en dr Bus jeklomme und op Heim an jefahre. Do jov et dann die 3. Neuerung: Jedereine kunnt ussteige, wo hä wullt. Praktischerwiis woren die Koffer vun denne, die zoeesch ussteige wullte, am deefste em Bus verstaut. Nä wat ne Zorteer! Op die Neuerung künne mer jot verzichte!

Ävver dovun afjesin wor et en herrliche Knubbeltour. Jenöchlilch un met vill Spass. Wie mr gehürt hät, woren och all zofridde und freuen sich schon op die nöchste Tour.

Dem neue Knubbelvörstand en hätzlich: Danke, dat hat ehr jot gemaht !!!