Mer setzen uns fröh am Morje met däm Bus Richtung Osten und dann Richtung Norden op uns Knubbeltour in Bewegung. Alle woren jot jelaunt be et vermeintliche Ziel durchsikerte. „Alstadt an der Bierstrasse“ Hingen em Bus fingen zwei an zo kriesche „Mer wulle nit in die „Verbotene Stadt“. Andere fingen später an zo singe „Lur ens  vun Düx noh Kölle“. Et wor zwar nit Düx ävver mehr fuhren üwer de Zoobrück jetz widder Richtung Westen. Do wor die Verwirrung perfekt. Der Bus nohm Kurs op dr „Platz vum himmlichen Frieden“ Uns echte Station maate mer en Kölle. Om Heumarkt flogen mer met Musik Richtung Walfesch „Un wenn mer su durch Kölle trecke …pass op dr eechte Knubbel kütt“, Dä Wäch kennt jeder drum hatte mer och keine Pilot nüdich. Manfred’s Plaat jitt et nit mieh (hätt widder Hoore) ävver alles andere wor bestens. Dat Buffet wor esu jross dat e paar Funke meinten „Blieve mer drei Daach he?“ Tatsach es keiner wullt jetz Kölle un dat lecker Kölsch hinger sech losse. Uns Ziel diesmol wor „Neustadt an der Weinstrasse“ Dä Wing wor mallich zo suur. Andere kunnte nit jenoch dovun kriege. Uns Violienche mot singe Lade später schlesse un dät met dr Bahn noh kumme. En Deidesheim hatte mer wahrlich e lecker „Galaovendesse“. En dr Kann wot nom Esse noch lang jesunge. Am nächste Morje woot uns om Hambacher Schloss die Demokratie jet nöher jebraaht. Mer lierten jet üver et Hambacher Fest vun 1832 do meinten einer „Mer Funke sin älder, nämlich vun 1823“ (hä soh och us wie e Jründungsmitglied). Beim Durchzälle stallte mer fass et Violinche wor fott. Hä mot zeröck noh Kölle, nit wägen singem „Heimweh noh Kölle“ sondern wägen nem Jeijekaste. Ovends wor hä widder dobei und at wor prima. Nohdäm all dat Wingfest jenosse hatte, trof mer sich widder em Hotel. Em Hingergrund spellte en Kapell un et wot jedanz. An dr Teek fingen die Nichtdänzer an zo singe „Un en Spetz un en Hack un en decke ….“

Am letze Daach jingk et dann en et Kloster Ebersbach. Noh dem janze Wing däten sich alle am dunkle Klosterbier labe. Wat mer do erläv han, kann kaum einer gläuve. Unser Ludwig Lebus, et Krätzje, und dr Franz Reichert spellten uns e Pottpurie us 80 Johre kölsche Ledcher vür. Fast alle hatten en Jänsehuck „Wann ich su an ming Heimat denke uns in dr Dom su vür mer stonn….“ Jetz jov et kein Halde mieh jetz wullten alle widder an et „Hätz vun dr Welt“. Ich weis et jetz nit mieh jenau op uns Violinche zwechendurch noch ens en Kölle wor ov nit jedenfalls höhrten mer en em Bus singe „Drei Daach sich freue nix bereue dat es Knubbeltour“ Wo mer nächs Johr hinfahre weis jeder. Mer sin secher op der Insel jitt et mieh als nur eine Ballermann.