Janz fröh am morje, esu medden en d'r Naach, su jejen drei Uhr, wann ne normale Minsche schlofe deit, trofen sich 50 Geheimräte, Oberkommerzienräte un Geheimsuperindendente an d´r Ülepooz, weil se op en Knubbeltour fahre wullte.

Zo Hus hatten e paar ald versök, sich met 'Küss die Hoand gnäd'ge Frau' zo verabschede, ävver manch Leevje wor noch fess am Schlofe. Mallich woss wo et hin jon sullt, et junk noh Wien mem Flugzeug.

Anjekumme, jot jefröstöck beim Zuckerbäcker Demel, finge mer schnellsten an, d'r drette Mann zo söke. Dem sin mer in Wien drei Dach op de Fäsch jewäse, ävver mer han en keimol jesinn. Penicillin hatt zom Jlöck keiner nüdich, un dat Heimweh kunnte mer met Heurigem, Gösser Bier un met d'r Musik vun unserem Franz en d'r Jreff krije.

Am nächste Dach om Riesenrad em Prater meinten doch e paar Funke, se künnten de zwei Spetze vum Kölner Dom sinn. Die Wiener hann zwar och ne Dom, dä hätt ävver nur eine Turm. Op die Entäuschung ham mer bei schönstem Sonnesching em Bierjade vum Schweizerhaus e paar Stelze verdröck und dat beste Budweiser vun d'r Welt jedrunke.

Am drette Dach, nodem ne Funk en et Röntgenjerät an d'r Sicherheitkontrolle em Flughave jerode wor, dä mote se zweimol hin un her fahre, wot et zick Heim zo kumme. De Jroß 'Küss die Hoand gnäd'ge Frau' feel ald widder en et Wasser, et wor ald reichlich spät als mallich sing Dör objeschlosse hatt.